Bashkimi Evropian ka njoftuar vendosjen e burimeve të reja ajrore për të mbështetur autoritetet franceze në përballimin e situatës së zjarreve në rajonin e Gironde. Njoftimi është bërë nga Komisionerja Evropiane, Hadja Lahbib, e cila ka konfirmuar angazhimin e mëtejshëm për shuarjen e flakëve përmes mjeteve të rezervës strategjike.
Sipas të dhënave, aktualisht në operacionet në terren janë angazhuar nëntë avionë. Për të përforcuar këto kapacitete, Bashkimi Evropian ka planifikuar dërgimin e dy avionëve shtesë, duke e çuar numrin total në 11 njësi.
"Aktualisht kemi nëntë avionë të vendosur në vend. Nesër do të kemi 11, që vijnë nga rezerva jonë strategjike evropiane. Është një garë me kohën që ekipet tona po zhvillojnë aktualisht në terren", theksoi Lahbib.
Kjo ndërhyrje vjen si pjesë e përpjekjeve të vazhdueshme për të frenuar përhapjen e zjarreve, të cilat kanë detyruar autoritetet të mobilizojnë të gjitha mjetet në dispozicion për të shmangur dëmet e mëtejshme në zonat e prekura.