Një aksident ajror ka ndodhur në qytetin Tomblaine, në verilindje të Francës, ku një aeroplan civil është rrëzuar pak minuta pas ngritjes nga aeroporti Nancy-Essey. Sipas autoriteteve lokale, nga rrëzimi i avionit kanë humbur jetën gjithsej 11 persona, të cilët ishin pjesë e një shkolle të parashutizmit.
Në mesin e viktimave janë konfirmuar piloti, pesë studentë dhe pesë instruktorë. Pas njoftimit për ngjarjen, në vendin e aksidentit kanë mbërritur forca të shumta të policisë, shërbime të emergjencës dhe zjarrfikës, të cilët kanë nisur operacionet për sigurimin e zonës.
Autoritetet franceze u kanë bërë thirrje qytetarëve të shmangin lëvizjet në perimetrin përreth aeroportit në departamentin Meurthe-et-Moselle. Ministri i Brendshëm i Francës është nisur drejt zonës për të ndjekur nga afër zhvillimet dhe hetimet mbi rrethanat e kësaj ngjarjeje. Deri më tani, shkaqet e rrëzimit mbeten të panjohura dhe autoritetet pritet të dalin me një deklaratë zyrtare pas përfundimit të hetimeve paraprake.
Përditësime
Autoritetet franceze dyshojnë se avioni, i cili u rrëzua të dielën, më 28 qershor, pësoi një defekt teknik përpara se të binte vertikalisht mbi një zonë të banuar pranë një qendre tregtare. Prefekti rajonal, Yves Seguy, konfirmoi ngjarjen që shkaktoi humbjen e jetës së 11 personave.
Autoritetet konfirmuan se 11 viktimat në bordin e avionit që u rrëzua në Francë, po kryenin hedhjen e tyre të parë me parashutë në prani të familjarëve. Sipas dëshmitarit Thierry Pechey, një pjesë e mirë e parashutistëve ishin infermierë. Ministri i Transportit, Philippe Tabarot, e cilësoi ngjarjen si tragjedi, ndërsa Ministri i Brendshëm, Laurent Nuñez, konfirmoi se nuk ka viktima në tokë, pavarësisht se avioni u rrëzua pranë një zone të banuar dhe një qendre tregtare.