Një gjykatë apeli në Paris ka shpallur fajtorë kompanitë Airbus dhe Air France për vrasje nga pakujdesia korporative lidhur me rrëzimin e fluturimit AF447 më 1 qershor 2009. Avioni Airbus A330 u zhduk nga radarët mbi Oqeanin Atlantik gjatë një stuhie të fortë dhe u rrëzua, duke shkaktuar vdekjen e të gjithë personave në bord.
Hetimet treguan se sensorët e shpejtësisë u ngrirën dhe ekuipazhi humbi kontrollin e avionit. Prokurorët akuzuan kompanitë për trajnim të pamjaftueshëm dhe për mosmarrje masash pas incidenteve të mëparshme të ngjashme.
Vendimi i Gjykatës së Apelit anulloi aktgjykimin e një gjykate më të ulët të prillit 2023, i cili i kishte shpallur të pafajshme të dy kompanitë. Gjykata urdhëroi që Air France dhe Airbus të paguajnë gjobën maksimale prej 225 mijë euro secila.
Familjarët e viktimave, kryesisht nga Franca, Brazili dhe Gjermania, e konsiderojnë vendimin si një njohje të vuajtjeve të tyre pas 17 vjetësh betejë ligjore. Disa prej tyre e kanë quajtur shumën e gjobës simbolike krahasuar me të ardhurat e kompanive.
Avokati i kompanive ka njoftuar se do të paraqiten apelime të tjera në gjykatën më të lartë të Francës, çka mund ta zgjasë procesin për disa vite të tjera.
Përditësime
Gjykata e Apelit në Paris ngriti gjobën maksimale për persona juridikë në 255,000 euro lidhur me tragjedinë e vitit 2009, e cila mori jetën e 216 pasagjerëve dhe 12 anëtarëve të ekuipazhit.