Këshilli i Bashkimit Evropian ka miratuar zyrtarisht paketën e tretë të asistencës financiare për Shqipërinë, në kuadër të programit European Peace Facility. Lajmi u bë i ditur nga Ministria e Mbrojtjes dhe ministri Ermal Nufi, të cilët theksuan rëndësinë e këtij investimi për sigurinë e vendit.
Fondi prej 21 milionë eurosh do të dedikohet për modernizimin e Forcave të Armatosura të Shqipërisë (FASh). Sipas njoftimeve zyrtare, paketa përfshin:
- Furnizimin me mjete të blinduara të lehta;
- Pajisje taktike dhe inxhinierike;
- Trajnimin e efektivëve dhe mbështetje operacionale.
Me këtë miratim, mbështetja totale e Bashkimit Evropian për modernizimin e ushtrisë shqiptare arrin në 49 milionë euro. Ministri Ermal Nufi e vlerësoi këtë vendim si një konfirmim të rolit aktiv që Shqipëria luan në arkitekturën e sigurisë evropiane dhe si dëshmi të besueshmërisë së shtetit shqiptar përkrah aleatëve ndërkombëtarë.