Pakti i ri i Bashkimit Evropian për Migracionin dhe Azilin do të hyjë gradualisht në fuqi më 12 qershor, duke vendosur standarde të reja për menaxhimin e mbërritjeve të migrantëve dhe refugjatëve. Korniza synon forcimin e sigurisë në kufijtë e jashtëm, përshpejtimin e procedurave të azilit dhe koordinimin më të mirë mes shteteve anëtare.
Sipas rregullave të reja, çdo person që hyn në mënyrë të parregullt do t'i nënshtrohet një procesi të detyrueshëm verifikimi, i cili përfshin:
• Verifikimin e identitetit;
• Kontrollin shëndetësor;
• Vlerësimin e sigurisë;
• Mbledhjen e të dhënave biometrike.
Një element thelbësor i këtij sistemi është zgjerimi i databazës Eurodac, e cila do të mundësojë mbledhjen më të gjerë të të dhënave dhe monitorimin më efikas të lëvizjeve të migrantëve brenda hapësirës evropiane.
Qeveria greke e ka mbështetur këtë nismë, duke e cilësuar si një mjet të nevojshëm për të garantuar mbrojtjen e kufijve dhe për të forcuar procedurat e kthimit për ata që nuk gëzojnë të drejtën e mbrojtjes ndërkombëtare. Ministri grek i Migracionit dhe Azilit, Thanos Plevris, deklaroi se autoritetet janë të gatshme të aplikojnë masa më të ashpra nëse presioni migrator vijon të rritet. Ai iu referua situatës në Kretë, ku vetëm brenda një dite u regjistruan rreth 600 emigrantë, duke theksuar se qeveria nuk do të lejojë përsëritjen e krizës së vitit 2015.