Greqia miraton ligjin për zhbllokimin e 90 mijë lejeve qëndrimi

Ministria e Migracionit dhe Azilit në Greqi ka përgatitur një projektligj të ri për migracionin e ligjshëm, i cili pritet të paraqitet së shpejti në Komisionin përkatës të Parlamentit. Ky projekt adreson vonesat në dhënien dhe rinovimin e lejeve të qëndrimit, me synim uljen e burokracisë dhe plotësimin e nevojave për fuqi punëtore. Aktualisht, në Greqi jetojnë rreth 793 mijë emigrantë të ligjshëm, ndërsa 293 mijë aplikime për leje qëndrimi mbeten në pritje.

Ministri Thanos Plevris deklaroi: «Me projektligjin e ri për migracionin e ligjshëm i japim fund vonesave shumëvjeçare dhe bllokimeve burokratike që kanë munduar punëtorët dhe bizneset». Vonesat kanë shkaktuar probleme për emigrantët, pasi lejet shpesh lëshohen pas skadimit, duke krijuar pasiguri në punë dhe integrim shoqëror.

Rregullimet kryesore

Projektligji parashikon:

• Zhbllokimin menjëherë të rreth 90 mijë lejeve në pritje dhe rregullimin e 90 mijë të tjerave brenda dy vitesh, duke prekur mbi 180 mijë persona.
• Rinovim automatik të lejeve për kategori të caktuara, veçanërisht kur emigranti vazhdon të punojë te i njëjti punëdhënës, pa dorëzimin e përsëritur të dokumenteve.
• Kohëzgjatje minimale dyvjeçare për çdo leje të re, për të shmangur penalizimet nga vonesat administrative.
• Mundësi riparaqitjeje për emigrantët që kanë qëndruar ligjërisht prej pesë vjetësh ose më shumë dhe kanë marrë refuzim për arsye formale, me korrigjimin e mangësive.

Ministria po forcon administratat e decentralizuara për shqyrtimin e aplikimeve dhe mundëson transferimin e dosjeve midis rajoneve. Këto masa synojnë të bëjnë një ndarje të qartë mes migracionit të ligjshëm dhe të paligjshëm, në një kohë kur çështja e migracionit është në qendër të debateve kombëtare dhe evropiane.