Parlamenti i Greqisë miratoi të martën një ligj të ri që ashpërson politikën ndaj emigracionit. Legjislacioni parashikon përshpejtimin e procedurave të dëbimit për personat, kërkesat për azil të të cilëve janë refuzuar, zgjatjen e periudhës së ndalimit administrativ, si dhe kufizimin e mundësive për legalizimin e qëndrimit për ata që janë pa dokumente.
Në përputhje me strategjinë e re të Bashkimit Evropian, qeveria greke planifikon transferimin e emigrantëve në qendra tranziti jashtë kufijve të BE-së. Ministri i Emigracionit, Thanos Plevris, bëri me dije se Athina po bashkëpunon me Holandën, Danimarkën, Gjermaninë dhe Austrinë për ngritjen e këtyre qendrave të përbashkëta. Gjithashtu, autoritetet greke kanë nisur bisedimet me dy vende afrikane, emrat e të cilave nuk janë bërë ende publikë, me synimin që këto qendra të jenë funksionale brenda vitit 2027.
Miratimi i këtij ligji nxiti debate të ashpra në sallën e parlamentit. Një moment i diskutuar ishte ndërhyrja e ish-ministrit Makis Voridhis, i cili, duke folur për kufijtë e veprimit shtetëror, shtroi pyetjen retorike: “A do ta fundosim barkën apo nuk do ta fundosim?”. Ai sqaroi se nuk po propozonte një veprim të tillë, por se donte të theksonte se shteti duhet të veprojë brenda kuadrit të ligjit ndërkombëtar. Deklarata e tij shkaktoi reagime të forta nga partitë opozitare. Organizatat për të drejtat e njeriut kanë shprehur rezerva lidhur me këto ndryshime ligjore, duke paralajmëruar për mundësinë e shkeljeve të të drejtave themelore të njeriut. Sipas analistëve, ky ashpërsim i qëndrimit qeveritar lidhet edhe me presionin politik të ushtruar nga forcat e krahut të djathtë.