Bayern Munich u dënua nga Komiteti Disiplinor i UEFA-s me një gjobë prej 50 mijë eurosh dhe mbyllje pjesore të Alianz Arenës për përdorimin e përsëritur të mjeteve piroteknike në Tribunën Jugore gjatë ndeshjeve të fundit në shtëpi të Ligës së Kampionëve.
Ndëshkimi fillimisht u pezullua pas ndeshjes kundër Sporting Lisbonës, por u aktivizua pas përdorimit të ri të flakadanëve në ndeshjen e fillim dhjetorit. Kështu, klubi njoftoi se do të mbyllë të gjithë Tribunën Jugore për ndeshjen kundër Union Saint-Gilloise të Belgjikës më 21 janar.
Sipas shpjegimit të klubit në faqen zyrtare, shitja e biletave nuk ndahet sipas blloqeve specifike në nivelin e poshtëm të Tribunës Jugore. Të gjitha 9.336 biletat për blloqet 109-117 janë të vlefshme, duke e bërë të pamundur anulimin selektiv vetëm të 4.800 biletave për blloqet 111-114 të dënuara nga UEFA.
Për këtë arsye, Bayern Munich do të anulojë të gjitha biletat për Tribunën Jugore dhe do të rimbursojë çmimet e tyre. Kjo masë rezulton në mungesën e rreth 10 mijë tifozëve në atë zonë të stadiumit.
Drejtori ekzekutiv Jan-Christian Dreesen kritikoi ashpër tifozët pas incidenteve, duke shprehur shqetësim se ndeshja mund të ndërpritej për shkak të dukshmërisë së dobët. Ai e quajti sjelljen e papranueshme dhe parashikoi ndëshkimin e UEFA-s, duke theksuar se mjetet piroteknike hyjnë në stadium pavarësisht kontrolleve, siç ndodh edhe në stadiume të tjera.