Vendet anëtare të Bashkimit Europian miratuan në COELA versionin final të raportit të vlerësimit të pikave të ndërmjetme për Shqipërinë, të njohur si IBAR. Teksti përfundimtar është më i ashpër se drafti fillestar i Komisionit Europian dhe vendos theksin te kushtet konkrete që duhet të plotësohen për mbylljen e Kapitullit 1 mbi themelet e shtetit të së drejtës.
Raporti vlerëson rezultatet e SPAK-ut dhe të gjykatave të posaçme në hetimin e korrupsionit të nivelit të lartë. Në të njëjtën kohë ai shpreh shqetësim për përpjekjet në rritje nga zyrtarë publikë ose politikanë, përfshirë nivele të larta, për të ndërhyrë në punën e institucioneve të drejtësisë.
Për herë të parë në një dokument të tillë përmenden rrjetet patronazhiste dhe kërkohet ulja e ndikimit të tyre, si dhe garantimi i një fushe loje të barabartë në zgjedhje. Korrupsioni përshkruhet si shqetësim thelbësor dhe jo më vetëm serioz, ndërsa theksohet nevoja për zbatim të vendimeve të Gjykatës Kushtetuese dhe të standardeve të Komisionit të Venecias lidhur me imunitetin.
Dokumenti prek gjithashtu çështjet e pronësisë, zonave bregdetare, transparencës së ndërmarrjeve publike dhe integritetit të policisë. Ai kërkon rezultate më të matshme në luftën kundër korrupsionit në administratën qendrore dhe vendore, si dhe në sektorët e ekonomisë.