Bashkimi Evropian shprehu të hënën keqardhje që Serbia nuk ka marrë ende hapat e nevojshëm për të sjellë para drejtësisë përgjegjësit e sulmit në fshatin Banjskë të Kosovës më 24 shtator 2023. Një zëdhënës i BE-së e bëri këtë deklaratë për Radion Evropa e Lirë dhe KOHËN, duke komentuar vendimin e Gjykatës Themelore në Prishtinë të datës 24 prill.
Gjykata i dënoi Blagoje Spasojeviqin dhe Vladimir Toliqin me burgim të përjetshëm, ndërsa Dušan Maksimoviqin me 30 vjet burgim. Të tre ishin pjesë e një grupi prej 45 personash të akuzuar nga autoritetet kosovare, përfshirë Milan Radoiçiqin, atëherë nënkryetar i Listës Serbe. Radoiçiq mori përgjegjësinë për sulmin. Pjesa tjetër e të akuzuarve, 42 persona, janë në arrati.
Sulmi filloi kur një grup i armatosur serbësh bllokoi urën në Banjskë të Zveçanit dhe sulmoi policët kosovarë që shkuan për ta liruar rrugën. Si pasojë, u vra rreshteri i Policisë së Kosovës Afrim Bunjaku dhe u plagosën dy policë të tjerë. Në përgjigje të të shtënave, u vranë edhe tre sulmues serbë.
Autoritetet e Kosovës e cilësojnë sulmin si të organizuar nga Serbia, me Radoiçiqin si udhëheqës të grupit. Beogradi hedh poshtë këto akuza. Gjykata kosovare ndau procedurat penale për tre të dënuarit, të cilët ishin në paraburgim që nga shtatori 2023, dhe refuzoi gjykimin në mungesë për të tjerët.
BE-ja ka bërë thirrje të përsëritura për veprime nga Serbia.