Bashkimi Evropian vazhdon të mbajë qëndrimin se Serbia nuk ka ndërmarrë hapat e domosdoshëm për t'i nxjerrë para drejtësisë përgjegjësit për sulmin e vitit 2023 në veri të Kosovës. Ky qëndrim është përsëritur nga zëdhënësit e Komisionit Evropian si përgjigje ndaj interesimit rreth raportimeve të fundit mediatike.
Së fundmi, një hulumtim i publikuar nga Radio Evropa e Lirë ka identifikuar dy pjesëtarë të Xhandarmërisë së Serbisë, të cilët dyshohet se janë pjesë e sigurimit të Zvonko Veselinoviqit dhe Milan Radoiçiqit. Analiza bazohet në fotografi, burime të hapura dhe gjurmë publike që i lidhin individët me njësinë speciale të policisë serbe.
Pavarësisht kërkesave të përsëritura nga institucionet evropiane për llogaridhënie, autoritetet në Serbi kanë mohuar pretendimet se të dyshuarit mbrohen nga struktura shtetërore. Presidenti i Serbisë, Aleksandar Vuçiq, ka mbrojtur publikisht figurën e Milan Radoiçiqit, duke deklaruar se nuk e konsideron atë kriminel.
Sulmi në Banjskë, i cili nga Bashkimi Evropian është cilësuar si sulm terrorist, mbetet çështje kyçe në procesin e integrimit të Serbisë. Ndonëse Këshilli i BE-së e ka dënuar vazhdimisht aktin, ende nuk ka pasur masa konkrete sanksionuese ndaj Beogradit.