Ngjarjet në Banjskë vijojnë të jenë një prej çështjeve më të diskutuara në procesin e integrimit evropian të Serbisë. Bashkimi Evropian dhe Shtetet e Bashkuara këmbëngulin në ndjekjen penale të personave përgjegjës për sulmin e armatosur, i cili përfaqëson një prej temave të hapura në dialogun dhe raportet e Beogradit me partnerët perëndimorë.
I dyshuari kryesor, Milan Radoiçiq, i cili ka marrë publikisht përgjegjësinë për organizimin e grupit të armatosur, ndodhet aktualisht në Serbi, ku ka vendbanim të regjistruar në Beograd. Presidenti serb, Aleksandar Vuçiq, ka deklaruar se Radoiçiq është shpallur në kërkim ndërkombëtar nga Interpol-i për shkaqe politike që lidhen me Kosovën, duke hedhur poshtë pretendimet se bëhet fjalë për kriminalitet.
Në Prokurorinë e Lartë Publike në Beograd zhvillohet procedurë penale kundër Radoiçiqit për disa vepra, përfshirë ato kundër sigurisë së përgjithshme. Gjatë marrjes në pyetje, ai i mohoi akuzat dhe u lirua për t'u mbrojtur në liri, me detyrimin për t'u paraqitur rregullisht në polici. Deri më sot, procedura nuk ka pasur një epilog gjyqësor, ndërsa opozita proevropiane në Serbi vlerëson se ky rast po ndikon negativisht në marrëdhëniet e vendit me partnerët ndërkombëtarë.