Kryetari i Partisë Demokratike të Kosovës (PDK), Bedri Hamza, ka njoftuar se ka zhvilluar një bisedë telefonike me ish-presidentin Hashim Thaçi. Gjatë këtij komunikimi, ata diskutuan për zhvillimet në Kosovë, çështje familjare dhe procesin e gjatë gjyqësor që po zhvillohet në Dhomat e Specializuara të Hagës.
Hamza theksoi se biseda u përqendrua te vonesat në shpalljen e aktgjykimit, duke nënvizuar se "drejtësia mund të vonohet, por nuk duhet të tjetërsohet". Ai shprehu bindjen e tij se data 16 shtator do të shënojë vendosjen e drejtësisë për Thaçin dhe bashkëluftëtarët e tij, duke shtuar se pret rikthimin e tyre në Kosovë.
Gjatë bisedës, Hamza i përcolli ish-presidentit përshëndetjet dhe mbështetjen e qytetarëve, ndërsa Thaçi kërkoi që t'u përcilleshin përshëndetjet e tij të përzemërta qytetarëve. Hamza bëri të ditur gjithashtu se para pak ditësh kishte realizuar një bisedë të ngjashme edhe me ish-kryeparlamentarin Kadri Veseli.
Në përmbyllje të mesazhit të tij, kreu i PDK-së shtoi: "Dielli do të lindë përsëri! Për çlirimtarët, për historinë tonë të lavdishme dhe për Kosovën!"
Përditësime
Kandidati për kryeministër, Bedri Hamza, ka zhvilluar një bisedë telefonike me ish-presidentin Hashim Thaçi. Sipas njoftimit, biseda u përqendrua te çështje personale, familjare dhe situata e qytetarëve. Hashim Thaçi shprehu qetësi dhe optimizëm, duke konfirmuar mundësinë e një takimi të afërt me fjalët: 'shumë shpejt do të shihemi në Kosovë'.