Në shënimin e 27-vjetorit të Masakrës së Reçakut, kryetari i Partisë Demokratike të Kosovës (PDK), Bedri Hamza, ka bërë homazhe te varrezat e dëshmorëve në Shtime dhe në Kompleksin Memorial në Reçak.
Hamza u shpreh se kjo ngjarje ka kontribuar në lirinë dhe pavarësinë e Kosovës. Ai falënderoi ambasadorin William Walker për rolin e tij në publikimin e masakrës dhe theksoi se falë sakrificës, jetës dhe gjakut të derdhur të dëshmorëve, si dhe ngjarjeve të tjera në Kosovë, populli gëzon sot lirinë.
Në prononcimin për media, Hamza deklaroi: "Jemi këtu për të shprehur nderimet dhe respektin për këtë ngjarje, për këta të rënë që është një prej ngjarjeve që ka kontribuar në lirinë dhe pavarësinë e Kosovës. Falënderojmë edhe ambasadorin William Walker që ka dhënë kontributin e tij, e ka bërë publike këtë ngjarje dhe falë sakrificës, jetës dhe gjakut të të gjithë këtyre por edhe ngjarjeve gjithandej Kosovës ne gëzojmë lirinë dhe pavarësinë e Kosovës. Gjithmonë do të shprehim respektin deri në përulësi për kontributin dhe veprën e tyre".
Homazhet u zhvilluan më 14-15 janar 2026, me pjesëmarrjen e ekipit të PDK-së.