Kandidati për kryeministër nga radhët e Partisë Demokratike të Kosovës (PDK), Bedri Hamza, ka prezantuar planin e tij për transformimin e sektorit energjetik në vend. Në një reagim publik, ai theksoi nevojën për një partneritet strategjik me Shtetet e Bashkuara të Amerikës, duke mundësuar kështu lidhjen e Kosovës me korridoret rajonale të gazit natyror.
Sipas Hamzës, politikat e deritanishme kanë krijuar një varësi të lartë nga importet e shtrenjta, duke ngarkuar faturat e qytetarëve dhe duke zvogëluar konkurrueshmërinë e bizneseve vendore. Ai bëri të ditur se, gjatë pesë viteve të fundit, Kosova ka shpenzuar rreth 1 miliard euro për import të energjisë elektrike.
Hamza vuri në dukje se Kosova mbetet i vetmi vend në Ballkanin Perëndimor që nuk është pjesë e rrjeteve të gazit natyror. Si mundësi konkrete për realizimin e këtij projekti, ai përmendi gazsjellësin Aleksandrupoli–Shkup, i cili pritet të kalojë rreth 15 kilometra larg kufirit të Kosovës.
Kandidati i PDK-së theksoi se ndërtimi i kësaj infrastrukture do të ofronte më shumë siguri energjetike, më pak ndotje dhe çmime më të përballueshme. Ai u zotua se, nëse zgjidhet në krye të qeverisë, nisja e këtij projekti do të jetë ndër prioritetet kryesore të ekzekutivit.