Kryetari i Partisë Demokratike të Kosovës (PDK), Bedri Hamza, ka zhvilluar një takim me ambasadorin e Austrisë në Kosovë, Georg Schnetzer, për të diskutuar zhvillimet aktuale politike dhe procesin e konstituimit të institucioneve të reja në vend.
Nëpërmjet një njoftimi, Hamza nënvizoi nevojën për institucione funksionale, stabile dhe efektive, pas një periudhe të gjatë të paqëndrueshmërisë politike. "Presim që certifikimi i rezultatit të zgjedhjeve të përfundojë në ditët e ardhshme. PDK mbetet e përkushtuar ndaj demokracisë, funksionimit të institucioneve dhe mbrojtjes së interesit shtetëror", deklaroi ai.
Gjatë takimit, kryetari i PDK-së shprehu shqetësimin për rrjedhën e zhvillimeve në vend, duke vlerësuar se Kosova ka shënuar prapakthim në fusha thelbësore, siç janë:
- Zhvillimi ekonomik;
- Integrimi euroatlantik;
- Sundimi i ligjit;
- Lufta kundër korrupsionit;
- Liria e shprehjes.
Në përfundim, Hamza rikonfirmoi përkushtimin e partisë për të kontribuar në forcimin e institucioneve demokratike dhe për avancimin e prioriteteve strategjike të Kosovës, në interes të qytetarëve dhe të ardhmes euroatlantike të vendit.