Presidenti i Republikës së Shqipërisë, Bajram Begaj, ka reaguar përmes rrjeteve sociale pas zgjedhjeve parlamentare të zhvilluara në Kosovë më 7 qershor. Ai ka uruar kryeministrin në detyrë, Albin Kurti, për rezultatin e arritur në këtë proces zgjedhor.
Në mesazhin e tij, Begaj ka përgëzuar qytetarët e Kosovës për pjekurinë e treguar në një proces që ai e ka cilësuar të rregullt, të qetë dhe demokratik. Sipas kreut të shtetit, ky proces dëshmoi edhe një herë forcën e institucioneve dhe kulturën demokratike të shtetit të Kosovës.
Duke iu referuar periudhës paszgjedhore, Begaj ka theksuar domosdoshmërinë e një angazhimi konstruktiv nga të gjitha subjektet politike.
“Në këtë fazë, është me rëndësi që të gjitha forcat politike të angazhohen me përgjegjësi dhe frymë konstruktive për të garantuar dialogun dhe kompromisin institucional, në funksion të stabilitetit, zhvillimit të mëtejshëm të vendit dhe përmbushjes së aspiratave të qytetarëve të Kosovës”, ka deklaruar ai.
Në përmbyllje, Begaj ka rikonfirmuar mbështetjen e Shqipërisë për Kosovën në çdo hap të rrugëtimit të saj drejt integrimeve euroatlantike. Zgjedhjet e parakohshme të së dielës, sipas të dhënave të Komisionit Qendror të Zgjedhjeve (KQZ), u fituan nga Lëvizja Vetëvendosje, e cila ka siguruar 42,91% të votave.