Presidenti i kompanisë MABCO, Behgjet Pacolli, i është drejtuar me një kërkesë publike Prokurorisë së Posaçme Kundër Korrupsionit dhe Krimit të Organizuar (SPAK) për të nisur hetime të plota në lidhje me situatën në Aeroportin e Vlorës. Sipas Pacollit, kompania dhe nënkontraktorët e saj janë rikthyer në ambientet e punës pas një bllokade të paligjshme që ka zgjatur për më shumë se dhjetë muaj.
Në reagimin e tij, biznesmeni thekson se gjatë kësaj kohe kantieri ka qenë i uzurpuar nga grupe që ai i cilëson si kriminale, të cilat kanë shkaktuar dëme të rënda në inventarin e posaçëm, pajisjet e specializuara dhe mjetet e punës. Pacolli bëri të ditur se aktualisht është duke u kryer një proces i detajuar i inventarizimit dhe evidentimit të vandalizmit, vjedhjeve dhe shkatërrimeve të ndodhura.
Krahas dëmeve materiale, Pacolli shprehu shqetësimin mbi cenimin e pronës private dhe sigurisë së investimeve, duke ngritur dyshime se veprimtaria e personave të përfshirë mund të jetë mbështetur ose toleruar nga individë me lidhje institucionale. Ai u ka bërë thirrje institucioneve kompetente që të marrin masa për të garantuar sigurinë e punonjësve dhe të parandalojnë çdo përshkallëzim të mëtejshëm, duke nënvizuar se kthimi në kantier është bërë në përputhje me vendimet gjyqësore.