Biznesmeni dhe investitori Behgjet Pacolli ka kërkuar ndërhyrje të menjëhershme të institucioneve të shtetit shqiptar lidhur me bllokimin e punimeve në projektin e Aeroportit të Vlorës. Sipas Pacollit, situata e krijuar që nga data 18 maj 2026 po shkakton dëme të konsiderueshme për ekonominë kombëtare dhe imazhin e vendit.
Në qëndrimin e tij, Pacolli nënvizon se kompania koncesionare MABCO ka investuar mbi 310 milionë euro në këtë projekt përmes kapitaleve dhe garancive financiare. Ai thekson se bllokimi bie ndesh me vendimet e formës së prerë të Gjykatës së Apelit dhe Gjykatës së Lartë. Përplasja ndërlidhet me një mosmarrëveshje mes MABCO dhe shoqërisë 2A Group, e drejtuar nga biznesmeni Valon Ademi.
Kolegji civil i Gjykatës së Lartë ka rrëzuar padinë e 2A Group, duke i dhënë të drejtë MABCO-s për kontrollin e aeroportit. Megjithatë, vendimet e mëparshme të gjykatave të shkallës së parë, të cilat kishin pezulluar të drejtat vendimmarrëse të MABCO-s, kanë krijuar situata juridike kontradiktore.
Pacolli i ka bërë thirrje Prokurorisë dhe organeve të rendit që të ndërhyjnë për rivendosjen e ligjshmërisë dhe zhbllokimin e punimeve, duke argumentuar se vonesat nuk burojnë nga investitori, por nga procese gjyqësore që kanë prodhuar pasiguri juridike.