Kompania MABCO Construction SA ka kërkuar ndërhyrjen e Ministrisë së Infrastrukturës dhe Energjisë për të mundësuar hyrjen e menjëhershme të personelit dhe nënkontraktorëve në kantierin e Aeroportit Ndërkombëtar të Vlorës. Në letrën zyrtare drejtuar ministrit Enea Karakaçi, kompania kërkon largimin e pengesave që po parandalojnë përfundimin e punimeve dhe nisjen e procesit të certifikimit.
Sipas Behgjet Pacollit, bllokimi i kantierit vijon të jetë aktiv pavarësisht vendimit të Gjykatës së Lartë, e cila ka rrëzuar masat mbi të cilat ishte mbështetur ndërprerja e aksesit. MABCO raporton se prej më shumë se gjashtë javësh, kantieri është nën kontrollin e grupeve që veprojnë pa bazë ligjore, duke shkaktuar dëmtime në pajisje dhe vonesa të kushtueshme në projekt.
Kjo kërkesë vjen në një moment kritik për raportet mes qeverisë dhe kompanive kontraktore, MABCO dhe 2A Group. Ministri Enea Karakaçi ka vendosur më herët një afat prej 30 ditësh për zgjidhjen e mosmarrëveshjeve kontraktore, duke paralajmëruar sanksione të ashpra, që mund të arrijnë deri në prishjen e koncesionit, nëse punimet nuk përparojnë sipas planit. Kompania thekson se rikthimi i kontrollit ligjor mbi kantierin është parakusht i domosdoshëm për rifillimin e menjëhershëm të operacioneve të mbetura.