Ish-presidenti i Kosovës, Behgjet Pacolli, ka reaguar ashpër në lidhje me situatën në Aeroportin Ndërkombëtar të Vlorës, duke e cilësuar atë si një cenim të rëndë të shtetit të së drejtës. Ai deklaroi se ky projekt strategjik po përballet me pengesa të vazhdueshme për shkak të veprimeve të paligjshme dhe vetëgjyqësisë së disa personave, ndërsa institucionet përgjegjëse, sipas tij, vazhdojnë të mos ndërhyjnë për të rivendosur rendin ligjor.
Sipas Pacollit, kompania zvicerane Mabco, e cila është pjesë e këtij partneriteti publik-privat (PPP), ka investuar qindra milionë euro në bazë të një kontrate koncesionare të rregullt. Ai nënvizoi se megjithëse Gjykata e Lartë ka dhënë vendime në favor të kompanisë në të gjitha çështjet e shqyrtuara, situata në terren vijon të jetë e bllokuar për shkak të mungesës së reagimit institucional.
Në deklaratën e tij, Pacolli renditi pasojat e kësaj situate, duke theksuar se vonesat po shkaktojnë dëme të konsiderueshme financiare, teknike dhe reputacionale për projektin dhe për imazhin e Shqipërisë si destinacion për investimet e huaja. Ai bëri të ditur se pavarësisht dhjetëra kallëzimeve dhe denoncimeve të depozituara pranë organeve kompetente, nuk është ndërmarrë ende asnjë veprim efektiv për rivendosjen e ligjshmërisë.
Në këtë kuadër, Pacolli u është drejtuar me një thirrje publike SPAK-ut, Prokurorisë dhe institucioneve të tjera përgjegjëse, duke kërkuar:
• Fillimin e hetimeve të plota, të pavarura dhe transparente.
• Verifikimin e çdo ndërhyrjeje të paligjshme në projekt.
• Identifikimin e përgjegjësve dhe përcaktimin e përgjegjësive penale e institucionale.
• Ndërmarrjen e masave të menjëhershme për rikthimin e rendit ligjor.
Ai e mbylli reagimin e tij duke theksuar se heshtja institucionale cenon interesin publik dhe imazhin ndërkombëtar të vendit, duke u bërë thirrje organeve të drejtësisë që të veprojnë me profesionalizëm dhe vendosmëri.