Departamenti Amerikan i Drejtësisë ka publikuar dokumente të reja nga dosja e Jeffrey Epstein-it, ku shfaqen komunikime që përmendin emra të lidhur me Kosovën.
Në një email të datës 19 shtator 2012, të dërguar nga konsulja e Kosovës në Tajlandë, Mom Luang Rajadasari Jayankura (identifikuar si “Daniel” në disa komunikime), titulli është “Kush është Behgjet Pacolli?”. Mesazhi drejtohet Jeffrey Epstein-it dhe thuhet: “Përshëndetje Jeffrey, princesha dëshiron që ti ta shohësh këtë video”, duke bashkëngjitur një lidhje nga YouTube, e cila tani nuk është më aktive. Konsulja sugjeron: “Mund t’ia dërgosh këtë Jeffreyt”.
Në një email tjetër të vitit 2012, e njëjta konsulle përmendet në kontekst të një takimi të mundshëm në New York. Mesazhi shkruan: “Mirë se vini në Paris. Princesha nga Tajlanda do të jetë në New York, Kombet e Bashkuara, me presidenten e Kosovës. Ajo do të donte të ju takonte nëse keni kohë këtë javë”. Edhe pse emri i presidentes nuk përmendet drejtpërdrejt, në atë vit presidente e Kosovës ishte Atifete Jahjaga.
Mom Luang Rajadasari Jayankura ka deklaruar më parë se ka luajtur rol në njohjen e Kosovës nga Tajlanda dhe vende të tjera. Në një tekst autorial, ajo përshkruan njohjen me Behgjet Pacollin në Filipine në nëntor 2011 dhe bashkëpunimin për mbështetje ndërkombëtare të Kosovës, duke e cilësuar atë si të drejtë legjitime për ekzistencën e saj si entitet sovran në sistemin politik, social dhe ekonomik botëror.
Publikimi i këtyre email-eve nuk përmban akuza penale ndaj personave të përmendur.
Përditësime
Valentina Abazi, këshilltare e Atifete Jahjagës, mohoi ndonjë takim ose njohje të ish-presidentes me Jeffrey Epstein.
Behgjet Pacolli, i përmendur në email-et e dosjes Epstein të 2012-s, deklaroi se nuk ka takuar, komunikuar apo vizituar kurrë pronat e tij. Ai shtoi se ka dëgjuar për të vetëm kohët e fundit.
Behgjet Pacolli mohon çdo lidhje me email-et e dosjes Epstein të vitit 2012. Ai paralajmëron hapjen e çështjeve penale në gjykatat e Kosovës, Shqipërisë dhe Libisë kundër një ish-bashkëpunëtori, të cilin e akuzon për inskenim. Në postimin e tij, Pacolli përshkruan një bashkëpunim 20-vjeçar me këtë person, duke përmendur mashtrime, falsifikime, tentativa poshtërimi dhe vjedhje. Ai planifikon të paraqesë fakte në gjykata penale dhe civile në Kosovë, Shqipëri, Emirate dhe Libi.
Atifete Jahjaga ka mohuar çdo lidhje personale me Jeffrey Epstein, duke e cilësuar korrespondencën si mes palëve të treta.
Dosjet e Epstein-it përmendin Milo Đukanoviç dhe Miroslav Lajçak në mesazhe mes tyre.
Email-i i dytë daton më 12 shtator 2012.