Ish-deputeti i Kuvendit të Kosovës, Bekim Haxhiu, i njohur si "Kamishi", ka njoftuar se ka paraqitur dy ankesa në Gjykatën Supreme. Ai kundërshton shkelje të rënda ligjore që, sipas tij, kanë deformuar rezultatin e zgjedhjeve.
Ankesat lidhen me pranimin e 23.232 pakove me fletëvotime përmes postës pas përfundimit të afatit ligjor, si dhe me përllogaritjen e mandateve për Kuvendin e Kosovës nga KQZ.
Në një postim në Facebook, Haxhiu shkruan se ky veprim ka ndikuar drejtpërdrejt në ndarjen e mandateve dhe ka anashkaluar vullnetin e lirë të qytetarëve. Ai akuzon KQZ-në se ka përmbysur renditjen reale të votave përmes një përllogaritjeje mekanike dhe të padrejtë, duke shkelur parimin e barazisë së votës dhe duke cenuar të drejtën kushtetuese për t’u zgjedhur.
Haxhiu kërkon nga Gjykata Supreme të veprojë me përgjegjësi institucionale dhe të mbrojë demokracinë, duke garantuar që çdo votë të ketë të njëjtën peshë dhe rezultati përfundimtar të pasqyrojë realisht vullnetin e qytetarëve.
Ai deklaron se është i vendosur ta çojë këtë betejë deri në fund dhe falënderon për mbështetjen. "Demokracia nuk mbrohet me heshtje, por me ligj, drejtësi dhe guxim institucional", shkruan ai.