Sipas të dhënave nga rrjeti evropian për monitorimin e vdekshmërisë, EuroMOMO, dhe raportimeve të së përditshmes belge Het Nieuwsblad, Belgjika është renditur si vendi me shkallën më të lartë të vdekshmërisë së tepërt pas valës së të nxehtit që përfshiu rajonin në fund të qershorit. Shifrat e publikuara nga instituti belg i shëndetit publik, Sciensano, tregojnë një tejkalim prej më shumë se 2.000 vdekjesh krahasuar me vlerat e pritshme për periudhën në fjalë.
Krahasuar me vendet fqinje, Belgjika ka pasur një përqindje vdekshmërie prej 48 për qind, ndërsa në Francë kjo shifër ka qenë 23 për qind dhe në Holandë 13 për qind, pavarësisht se temperaturat e larta kanë qenë të ngjashme në këto shtete. Në veçanti, rajoni i Flandrës raportoi një shkallë vdekshmërie të tepërt prej 31 për qind, shifër kjo që mbetet më e lartë se mesatarja kombëtare e vendeve të tjera të përmendura.
Biostatistikani Geert Molenberghs, nga KU Leuven dhe Universiteti Hasselt, ka theksuar se shkaqet e këtij numri të lartë të vdekjeve lidhen ngushtë me faktorë socio-ekonomikë dhe planifikimin urban. Sipas tij, dallimet midis Flandrës dhe Valonisë janë të dukshme. Ai shpjegoi se kushtet e banimit, siç janë apartamentet e vogla me densitet të lartë, e bëjnë popullatën më të cenueshme ndaj nxehtësisë.
Për më tepër, Molenberghs shtoi se praktikat e ndërtimit të konsideruara "të çrregullta" në Belgjikë mund të kenë ndikuar në përkeqësimin e efekteve të temperaturave të larta, duke shërbyer si një faktor kontribuues në këtë bilanc të rëndë të vdekshmërisë.