Ish-ministri i Shëndetësisë Ilir Beqaj i ka dërguar letër kryetarëve të komisioneve parlamentare Fatmir Xhafajt dhe Ulsi Manjës, si dhe Ministrit të Drejtësisë Toni Gogës, duke kërkuar ndërhyrje në Kodin e Procedurës Penale. Ai propozon rishikim të nenit 232/d, pika 3, që sipas tij lejon ndryshime të paligjshme të akuzës dhe prek parimet e procesit të rregullt ligjor. Beqaj sugjeron gjithashtu kontroll kushtetues nga Gjykata Kushtetuese për këtë aspekt.
Në dosjen e koncensionit të sterilizimit, Prokuroria e Posaçme kundër Korrupsionit dhe Krimit të Organizuar (SPAK) ngriti akuzën e shpërdorimit të detyrës në mars 2024. Gjatë seancës paraprake më 23 dhjetor 2024, gjyqtarja e Gjykatës së Posaçme të Shkallës së Parë për Korrupsionin dhe Krimin e Organizuar vlerësoi se cilësimi juridik ishte i gabuar. Bazuar në nenin 232/d, pika 3 të Kodit të Procedurës Penale, ajo ftoi prokurorin të korrigjojë akuzën.
Gjyqtarja propozoi cilësimin si vjedhje duke shpërdoruar detyrën, grup i strukturuar kriminal dhe kryerje veprash penale nga organizata kriminale, sipas neneve 135, 28 pika 4, 333/a dhe 334 pika 1 të Kodit Penal. Prokurori e pranoi ndryshimin në seancën e 7 prillit, për të shmangur kthimin e çështjes në hetim.
Avokatët e Beqajt, të udhëhequr nga Ermal Yzeiraj, kanë paralajmëruar kërkesë për pushim çështjeje në seancën e 28 prillit. Ata argumentojnë se mungon një akt akuze i formuluar nga prokuroria, çka bie ndesh me parimin "nuk ka gjykim pa akuzë të vlefshme". Sipas tyre, procesi ka devijuar nga shinat procedurale, kushtetuese dhe konventore, duke rrezikuar të drejtat e njeriut për një proces të rregullt gjyqësor.
Përditësime
Flojera Davishi, gjyqtarja e çështjes, nuk sqaroi qëndrimin me vendim.
Avokatët Florian Bonjaku dhe Ermal Yzeiraj argumentuan se akuza e re nuk u zyrtarizua nga SPAK. "Nuk ekziston akt akuze për ndryshimin e akuzës," deklaroi Yzeiraj.
Prokurorët e pranuan ndryshimin për të shmangur "rrethin vicioz". SPAK dërgoi dosjen më 29 mars 2024.