Gjatë seancës së zhvilluar në GJKKO, prokuroria kundërshtoi 23 kërkesat e paraqitura nga ish-ministri i Shëndetësisë, Ilir Beqaj, përmes të cilave ai kontestonte akuzat dhe veprimet procedurale të organit hetues. Prokurori Edvin Kondili argumentoi se shumica e pretendimeve kanë marrë përgjigje gjatë fazës hetimore dhe në seancën paraprake, duke theksuar se çështjet duhet të trajtohen gjatë shqyrtimit në themel.
Ndër argumentet e mbrojtjes, avokati Ermal Yzeiraj pretendoi se njoftimi i akuzës është i paqartë dhe se në dosje mungon kontrata origjinale e koncesionit. Në përgjigje, përfaqësuesi i SPAK-ut sqaroi se kontrata origjinale nuk është gjetur në Ministrinë e Shëndetësisë, por është siguruar kopja e njësuar pranë Fondit të Sigurimit të Detyrueshëm të Kujdesit Shëndetësor, si dhe kontrata e koncesionarit që ka zbatuar projektin.
Ilir Beqaj deklaroi se janë cenuar të drejtat e tij procedurale dhe shprehu vështirësi në organizimin e mbrojtjes. Ish-ministri ka mohuar përfshirjen në veprimtari të kundërligjshme, duke theksuar se koncesioni me vlerë 100 milionë euro solli modernizim të shërbimit spitalor dhe reduktim të infeksioneve.
Në këtë çështje, përveç Ilir Beqajt, janë marrë të pandehur edhe 8 persona të tjerë, ndër të cilët ish-zv-ministri Klodian Rrjepaj dhe përfituesi i koncesionit Ilir Rrapaj, si dhe 6 ish-zyrtarë të tjerë të Ministrisë së Shëndetësisë. Vendimi i gjykatës për parashtrimet e mbrojtjes është planifikuar të jepet më 11 shtator.