Gjatë seancës së fundit gjyqësore, SPAK vlerësoi se të gjitha kërkesat procedurale të ngritura nga Ilir Beqaj në lidhje me dosjen e sterilizimit janë të pabazuara në ligj. Prokurori Edvin Kondili theksoi se shumica e këtyre pretendimeve kanë marrë përgjigje gjatë fazës së hetimit dhe në seancën paraprake, ku gjykata pranoi kërkesën për gjykimin e çështjes në themel.
Ndër kërkesat e rrëzuara nga organi i akuzës përfshihen pretendimet për pavlefshmërinë e njoftimit të akuzës, përjashtimin e të dhënave elektronike dhe kundërshtimet mbi mungesën e kontratës origjinale në Ministrinë e Shëndetësisë. Lidhur me kontratën origjinale, SPAK pranoi se ajo nuk është gjetur në ministri, por theksoi se një kopje e njësuar është siguruar në FSDKSH, duke e konsideruar këtë si provë të vlefshme.
Sa i përket akuzës për vjedhje, SPAK ritheksoi se dëmi financiar i shkaktuar buxhetit të shtetit është provuar dhe specifikuar gjerësisht në vendimin paraprak. Prokuroria sqaroi gjithashtu se pretendimet e të pandehurit shpesh formulojnë pyetje në vend të kërkesave, të cilat do të trajtohen gjatë konkluzioneve përfundimtare.
Nga ana e tij, Ilir Beqaj argumentoi se të drejtat e tij procedurale janë cenuar gjatë hetimeve, duke pretenduar se mungesa e qartësisë mbi akuzat e vështirëson mbrojtjen e tij. Ai ngriti pikëpyetje mbi periudhën hetimore 2019-2020, duke pretenduar se në këtë interval nuk ka pasur veprime hetimore paraprake, dhe kërkoi sqarime mbi ekspertizat laboratorike. Avokati mbrojtës kërkoi kohë shtesë nga trupi gjykues për të analizuar arsyetimin e detajuar të SPAK mbi 23 pikat e ngritura.
Përditësime
Gjykata shtyu për në 11 shtator seancën ndaj ish-ministrit Ilir Beqaj. I pranishëm në sallë pa pranga, Beqaj denoncoi shkeljet procedurale dhe akuzoi SPAK për keqpërdorim të pavarësisë institucionale pas Reformës në Drejtësi. Nga ana tjetër, prokurorët e SPAK parashtruan qëndrimin e tyre lidhur me rikualifikimin e akuzave, pas vendimit të gjyqtarit paraprak për ndryshimin e tyre.