Sali Berisha, kryetar i Partisë Demokratike, ka bërë thirrje për pjesëmarrje të gjerë në protestën e parashikuar më 22 mars në Shqipëri. Deklarata u bë nga Brukseli, ku ai merr pjesë në aktivitetet për 50-vjetorin e Partisë Popullore Evropiane (PPE) dhe samitin e liderëve evropianë.
Berisha nënvizoi se sytë dhe mendjet e partnerëve në Evropë dhe botë janë të drejtuar te qytetarët shqiptarë, te opozita dhe qëndresa e tyre ndaj qeverisë aktuale. Ai cilësoi protestën si kryengritje paqësore dhe i ftoi qytetarët të ngrejnë zërin fuqishëm, që mesazhi i saj të dëgjohet jo vetëm në Shqipëri, por edhe në Evropë dhe botë.
Gjatë samitit, Berisha u takua me figura të rëndësishme si Ursula von der Leyen, presidentja e Komisionit Evropian, dhe kancelari Merz. Ai shfrytëzoi rastin për të nxjerrë në pah situatën politike në Shqipëri. “Natyrisht, sytë, mendjet e miqve tanë, partnerëve tanë në Evropë dhe në botë janë të drejtuar te qytetarët shqiptarë, tek opozita shqiptare, qëndresa e tyre ndaj këtij regjimi, përpjekja e tyre për largimin e tyre”, deklaroi Berisha.
“Kështu që 22 marsi, këtu nga Brukseli shfrytëzoj rastin, nga ky moment historik siç ishte kremtimi i 50-vjetorit të PPE dhe samiti i liderëve kryesorë, [...] për t’u bërë thirrje shqiptarëve më 22 mars në kryengritjen tonë paqësore të ngremë zërin fuqishëm, të ushtrojë në Shqipëri dhe në Evropë dhe në botë zëri i protestës, zëri i kryengritësve paqësorë shqiptarë”, shtoi ai.