Besimtarët bektashinj kremtuan sot Ditën e Ashures, një prej momenteve më të rëndësishme në kalendarin e tyre shpirtëror, e cila pason dhjetë ditë zie dhe reflektimi. Ceremonia qendrore u zhvillua në Kryegjyshatën Botërore Bektashiane në Tiranë, ku u nderua kujtimi i Imam Hysenit dhe 72 dëshmorëve të Qerbelasë.
Kryegjyshi Botëror i Bektashinjve, Haxhi Dede Edmond Brahimaj, u bëri thirrje besimtarëve për mbështetje të ndërsjellë, ruajtje të vlerave të familjes dhe forcim të frymës së vëllazërisë. Në fjalën e tij, ai vuri theksin te nevoja për paqe dhe dhembshuri në botën e sotme.
“Lutjet tona shkojnë për ata që vuajnë nga luftërat dhe konfliktet. Sot njerëzimi ka nevojë më shumë se kurrë për drejtësi dhe dashuri. Le të jetë Ashurja një burim drite e shprese që na frymëzon të jemi bartës të paqes”, deklaroi Baba Mondi gjatë ceremonisë. Ai theksoi se ngjarja e Qerbelasë, si dëshmi e sakrificës përballë padrejtësisë, mbetet një udhërrëfyes për të dëshmuar mësimet e Imam Aliut, Imam Hasanit dhe Imam Hysenit përmes veprave të mira.
Përditësime
Kryegjyshi Botëror i Bektashinjve, Baba Mondi, bëri thirrje për 'ndriçim të mendjes' gjatë ceremonisë së Ditës së Ashures të mbajtur këtë të premte në Tiranë. Ai e cilësoi këtë ditë si simbol të sakrificës për liri dhe zhvillimin e një shoqërie të emancipuar.