BIRN ka publikuar një hetim mbi promovimin online të suplementeve, duke përfshirë krijimin e faqeve të klonuara dhe intervista të atribuoara mjekëve pa pëlqimin e tyre.
Një postim në Facebook, i atribuar mjekut Ilir Alimehmeti, endokrinolog dhe këshilltar bashkiak në Tiranë, pretendon se "9 nga 10 njerëz janë të infektuar me parazitë" dhe premton një recetë shtëpiake për të çliruar pacientët nga "deri në dy kilogramë krimba brenda natës". Ky postim drejton në një faqe që imiton portalin Newsbomb.al, ku publikohet një intervistë e supozuar me mjekun, që promovon preparatin Germostop si zgjidhës për parazitët dhe probleme të tjera shëndetësore.
Në fund të artikullit shfaqet një rrotulluese interaktive, që ofron ulje 50 për qind në çmim, të shoqëruar me formular porosie dhe numërues kohor prej 10 minutash. Nëse formulari plotësohet me të dhëna personale, një specialiste telefonon për të finalizuar shitjen, duke premtuar efikasitet ndaj simptomash të ndryshme.
Hetimi i BIRN-it, i zhvilluar me metoda kërkimore të hapura (OSINT), tregon se faqja është klon i portalit origjinal dhe intervista duket e rreme. Kjo taktikë pasqyron një model të njohur marketingu mashtrues në internet, ku klonohen faqe mediesh dhe keqpërdoren imazhet e personazheve publike.
Suplemente të tjera dhe kompania pas skemës
Germostop nuk është i vetmi. Në rrjetet sociale reklamohen suplemente të ngjashme për shëndetin, potencën seksuale dhe humbjen e peshës. Pas tyre qëndron kompania MonetizeAd d.o.o – Limited Charm nga Bosnje dhe Hercegovina, me degë në Tiranë, e cila ka fituar një reputacion famëkeq në rajon për praktika të tilla.
Hetimi nxjerr në dritë një biznes me vlerë miliona euro, që synon konsumatorët përmes alarmeve të rreme shëndetësore.