Të gjitha bizneset e mëdha me të ardhura mbi 14 milionë lekë kanë afat deri më 5 qershor për të aplikuar për marrëveshjen e Paqes Fiskale me administratën tatimore.
Aplikimi kryhet online nëpërmjet sistemit e-filing. Tatimpaguesit duhet të ngarkojnë formularin e aplikimit, vërtetimin nga Prokuroria që nuk ka procedime penale, dëshminë e penalitetit, vërtetimin që nuk është në proces ankimi administrativ, si dhe dy vetëdeklarime përkatëse.
Sipas marrëveshjes, mbi fitimin e deklaruar të biznesit shtohet një marzh prej 18%. Çdo fitim që kalon këtë prag tatohet me normë 5%. Bizneset që hyjnë në marrëveshje mund të korrigjojnë pasqyrat financiare të tre viteve të mëparshme me të njëjtën normë tatimore.
Administrata Tatimore do të kryejë kontrolle të shtuara për të parandaluar abuzimet dhe pastrimin e parave. Zbatimi i nismës monitorohet nga ekspertë të Fondit Monetar Ndërkombëtar dhe Bashkimit Europian.
Nga përfitimet përjashtohen bizneset që kanë norma të reduktuara tatimore, detyrime të papaguara, dënime të formës së prerë ose që janë subjekt hetimi.