Presidenti i Republikës Bajram Begaj ka dekretuar ligjet e paketës fiskale të miratuara nga Kuvendi, duke hapur rrugën për zbatimin e tyre. Këto ligje përfshijnë "Për marrëveshjen e Paqes Fiskale", "Për fshirjen, shuarjen dhe pagesën e detyrimeve tatimore ndaj administratës tatimore qendrore e vendore dhe e detyrimeve të pagueshme në doganë", si dhe ndryshimet në ligjin e TVSH-së për rimbursimin e 10% të TVSH-së për fermerët. Dekretimi u bë më 13 janar 2026.
Botimi në Fletoren Zyrtare është kushti kryesor për hyrjen në fuqi të ligjeve. Deri tani, nga shtatë ligjet e paketës, është publikuar vetëm ligji për "Rivlerësimin e Pasurive të Paluajtshme". Zbatimi i plotë do të nisë pas botimit dhe miratimit të udhëzimeve përkatëse nga Ministria e Financave dhe Administrata Tatimore.
Bizneset kanë shprehur interes të lartë për Marrëveshjen e Paqes Fiskale dhe ligjin për fshirjen e detyrimeve të papaguara në tatime dhe dogana, pavarësisht rezervave të shprehura nga institucionet ndërkombëtare. Shumë biznese kanë paraqitur kërkesa për nënshkrimin e marrëveshjes, por këto kërkesa po refuzohen nga inspektorët tatimorë për mungesë të akteve nënligjore që përcaktojnë procedurat konkrete.
Administrata Tatimore dhe Ministria e Financave kanë sqaruar se ligjet hyjnë në fuqi pas dekretimit, botimit në Fletoren Zyrtare dhe miratimit të udhëzimeve. Për ligjin e fshirjes së detyrimeve, udhëzimi duhet të miratohet brenda 15 ditëve nga hyrja në fuqi. Për Marrëveshjen e Paqes Fiskale, afati është deri në tre muaj.
Ligji "Për Marrëveshjen e Paqes Fiskale" hyn në fuqi 15 ditë pas botimit në Fletoren Zyrtare dhe shtrin efektet deri në vitin tatimor 2028. Marrëveshja zbatohet fillimisht për një vit tatimor, me të drejtë rinovimi për dy vite të tjera. Procedurat për hartimin, komunikimin elektronik, regjistrimin, administrimin, si dhe trajtimin e rasteve të refuzimit apo pavlefshmërisë do të përcaktohen me udhëzim të ministrit përgjegjës për financat.
Përditësime
FMN, Bashkimi Evropian dhe Dhoma Amerikane e Tregtisë kanë shprehur kundërshtim të fortë ndaj ligjit të Paqes Fiskale, të dekretuar nga Presidenti Begaj. FMN vlerëson se ky ligj minon progresin në administrimin tatimor dhe rrezikon qëndrueshmërinë fiskale, ndërsa Dhoma Amerikane e Tregtisë thekson mungesën e konsultimit dhe transparencës në procesin e miratimit.