Më 15 janar 2026, pas dekretimit nga presidenti Begaj, janë publikuar në Fletoren Zyrtare 7 ligjet që përbëjnë Paketën Fiskale për vitin 2026. Këto ligje, të miratuara nga Kuvendi më 12 dhjetor 2025, hyjnë në fuqi pas 15 ditësh dhe synojnë pastrimin e bilancave tatimore dhe doganorë.
Nisma prek detyrime të papaguara prej gati 2.1 miliardë euro, duke përfshirë mbi 200 mijë biznese debitore. Administrata tatimore dhe doganore do të fshijnë çdo borxh të krijuar para 31 dhjetor 2014, me vlerë rreth 1 miliard euro nga vitet 1990 deri atëherë. Kjo përfshin edhe faljen e gjobave dhe kamatave për detyrimet e sigurimeve shoqërore deri në 2014, me afat zbatimi deri më 31 dhjetor 2026.
Lehtësi për borxhet 2015-2024
Për borxhet tatimore dhe doganore nga janari 2015 deri më 31 dhjetor 2020:
- Nëse paguhet 50% menjëherë deri në qershor 2026, falet gjysma tjetër bashkë me gjobat dhe kamatat.
- Nëse paguhet me këste deri më 31 dhjetor 2026, falet 25% e detyrimit.
Për borxhet nga 1 janar 2020 deri më 31 dhjetor 2024, bizneset përfitojnë falje të gjobave dhe kamatave nëse paguajnë të gjitha detyrimet brenda 2026.
Sa i përket sigurimeve shoqërore për periudhën 2015-2024, falen gjobat dhe kamatat nëse paguhet 100% e kontributeve deri më 31 dhjetor 2026.
Transparenca e përfituesve
Paketa ka jetëgjatësi vetëm për vitin 2026. Pas pastrimit të bilancave, organet tatimore dhe doganore do të publikojnë deri më 31 janar 2027, në faqet e tyre zyrtare, listën e 3000 tatimpaguesve më të mëdhenj përfitues. Sipas nenit 3, pika ç, lista përfshin subjektet me detyrim të fshirë jo më të vogël se 5 milionë lekë.