Ministri i Turizmit, Kulturës dhe Sportit, Blendi Gonxhja, u vlerësua më 12 tetor në mjediset e Senatit Italian me çmimin “Luani i Artë për Merita”. Vlerësimi iu akordua me vendim të Komitetit të Luanit të Artë të Venecias dhe iu dorëzua gjatë ceremonisë.
Në fjalën e tij, Gonxhja e lidhi vlerësimin me rrugëtimin e tij nga Lëvizja Studentore e Dhjetorit 1990 te shërbimi publik. Ai tha se e ndan çmimin me familjen, kolegët dhe ekipin, si dhe me artistët, profesionistët e kulturës e turizmit dhe sportistët e kampionët shqiptarë. Sipas tij, çmimi njeh edhe punën dhe kontributin e këtyre fushave dhe përbën përgjegjësi të shtuar për projektet që mbulon ministria.
Ministri foli për lidhjet shekullore mes Shqipërisë dhe Italisë, të cilat, sipas tij, vijojnë përmes arbëreshëve dhe bashkatdhetarëve që kanë ndërtuar jetën në vendin fqinj. Ai theksoi rëndësinë e bashkëpunimit të ri mes institucioneve dhe artistëve, si dhe të mbështetjes për talentet e rinj, për forcimin e lidhjeve mes dy vendeve.
Gonxhja tha se institucionet duhet ta kthejnë pasurinë historike, trashëgiminë kulturore dhe krijimtarinë në mundësi zhvillimi për brezat e rinj. Ai nënvizoi se ruajtja e kulturës lidhet me kujdesin për trashëgiminë dhe me zgjedhjet e sotme për përcjelljen e saj në të ardhmen. Adriatikun e përshkroi si hapësirë takimesh dhe shkëmbimesh, ndërsa kulturën si formë diplomacie që afron shoqëritë dhe krijon mundësi bashkëpunimi.
Në ceremoni u nderuan personalitete nga diplomacia, institucionet publike, mjekësia, bota akademike, drejtësia, arti e kultura dhe fusha të tjera profesionale. Mes të pranishmëve ishte ambasadorja e Shqipërisë në Itali, Anila Bitri Lani.
“Luani i Artë për Merita” është vlerësim i Gran Premio Internazionale di Venezia. Ai u jepet personaliteteve për kontribut në art, kulturë, shkencë, ekonomi, sport dhe veprimtari shoqërore.