Ministri i Turizmit, Kulturës dhe Sportit, Blendi Gonxhja, zhvilloi një takim me presidentin e Bienales së Venecias, Pietrangelo Buttafuoco, në kuadër të Bienales së Venecias më 9 maj 2026. Takimi u fokusua në forcimin e partneritetit kulturor midis Shqipërisë dhe Italisë, si dhe në zgjerimin e bashkëpunimit institucional me Bienalen e Artit dhe Bienalen e Arkitekturës, dy platforma kryesore të diplomacisë kulturore ndërkombëtare.
Palët diskutuan ndërtimin e një bashkëpunimi afatgjatë që lidh kulturën, arkitekturën, kërkimin dhe edukimin artistik, duke krijuar ura të reja midis institucioneve, artistëve, kuratorëve, studiuesve dhe brezit të ri.
Në takim u trajtuan zhvillimi i shkëmbimeve kulturore, bashkëpunimet në arkivat dhe dokumentimin, si dhe proceset e ruajtjes, ekspozimit, studimit, kërkimit dhe shkrimit kritik mbi historinë e pavijoneve të Bienales ndër vite. Këto eksperienca synojnë t’i aktivizojnë në Shqipëri.
Një pjesë e rëndësishme e diskutimit iu kushtua hapjes së ardhshme të Galerisë Kombëtare të Arteve, institucion kyç për artin bashkëkohor shqiptar dhe zhvillimin e partneriteteve ndërkombëtare në ekspozita, arkiva dhe programe kuratoriale.
U shqyrtuan mundësitë për ekspozita të përbashkëta, programe shkëmbimi dhe aktivizimin e arkivave artistike si mjete të kujtesës kulturore dhe dialogut bashkëkohor. Vëmendje e veçantë u kushtua krijimit të hapësirave të reja bashkëpunuese për artistë, arkitektë, studiues dhe kuratorë shqiptarë.
Diskutimi përfshiu gjithashtu mundësinë për një prani më të qëndrueshme të Pavijonit Kombëtar të Shqipërisë në Bienalen e Venecias, si instrument të rëndësishëm për prezantimin ndërkombëtar të identitetit kulturor të vendit, dhe pjesëmarrjen e Shqipërisë në Bienalen e Arkitekturës dhe Bienalen e Artit në vitet e ardhshme.