Aksi i rrugës kombëtare që lidh Tiranën me zonën juglindore të vendit dhe anasjelltas vijon të jetë i bllokuar që prej orës 11:00 të ditës së dielë, në vendin “Kthesat e Dragostunjës”, në dalje të qytetit të Librazhdit. Bllokimi pamundëson kalimin normal të mjeteve në këtë segment.
Sipas Vizion Plus, shkaku është masivi i dheut. Nga ora 12:00, shërbimet e policisë rrugore janë në terren për të menaxhuar situatën dhe për të orientuar drejtuesit drejt akseve alternative.
Drejtuesit e mjeteve që udhëtojnë drejt Tiranës dhe rretheve të tjera udhëzohen të përdorin itinerarin Maliq–Lozhan–Moglicë–Gramsh–Elbasan.
Autoritetet u bëjnë thirrje drejtuesve të mjeteve të tregojnë kujdes të shtuar, të respektojnë udhëzimet në terren dhe të informohen paraprakisht për gjendjen e rrugëve deri në normalizimin e plotë të qarkullimit.
Përditësime
Bllokimi në Kthesat e Dragostunjës zgjati 7 orë, duke shkaktuar trafik të rëndë në aksin Librazhd-Qafë Thanë, sipas Ora News.