Bllokohet autostrada Tiranë-Durrës për tri net për punime

Në kuadër të projektit për zgjerimin e autostradës Tiranë–Durrës, ARRSH ka vendosur kufizime të përkohshme të qarkullimit për shkak të montimit të trarëve metalikë në hapësirën qendrore të mbikalimit të ri të Kasharit. Punimet do të kryhen gjatë tri netëve, përkatësisht në datat 1, 2 dhe 3 shtator 2026, në intervalin kohor nga ora 23:00 deri në 05:00. Gjatë këtyre orëve, lëvizja në të dyja drejtimet e aksit kryesor do të jetë e bllokuar dhe trafiku do të menaxhohet përmes devijimeve të përcaktuara.

Sipas skemës së menaxhimit të trafikut:

• Për drejtimin Tiranë–Durrës, automjetet do të devijohen përmes rampës provizore në drejtim të Rinasit, duke vazhduar në rrugën dytësore dhe duke u rikthyer në autostradë nëpërmjet rrugës së Rinasit. Mjetet e rënda dhe kamionët do të devijohen që në nyjën “Casa Italia”.

• Për drejtimin Durrës–Tiranë, mjetet do të orientohen përmes mbikalimit Kashar–Thumanë, duke ndjekur rrugën dytësore në anën e majtë deri pas mbikalimit të Kasharit, ku do të mund të rikthehen në autostradë.

• Automjetet me destinacion Rinasin, Shkodrën dhe Kosovën do të sinjalizohen dhe orientohen që në mbikalimin e autostradës Kashar–Thumanë për të ndjekur itineraret përkatëse.

ARRSH ka kërkuar bashkëpunimin e qytetarëve, bizneseve dhe banorëve të zonës, duke u bërë apel drejtuesve të mjeteve të planifikojnë lëvizjet paraprakisht dhe të shmangin, sa të jetë e mundur, këtë segment gjatë orarit të punimeve. Në vendngjarje do të vendoset sinjalistikë e përkohshme dhe do të ketë personel për menaxhimin e trafikut, të cilin drejtuesit e mjeteve janë të detyruar ta ndjekin me përpikëri.