Për shkak të punimeve për ndërtimin e linjës hekurudhore Tiranë-Durrës-Rinas, Hekurudha Shqiptare në bashkëpunim me Policinë Rrugore ka njoftuar kufizime të qarkullimit për automjetet në zonën e Kthesës së Kamzës dhe Rrethrrotullimit të Treshit.
Plani i menaxhimit të trafikut do të zbatohet përmes tre fazave kryesore:
• Faza e parë: Nga data 6 qershor, ora 24:00, deri më 7 qershor, ora 05:00, do të ketë bllokim total të qarkullimit. Automjetet që lëvizin drejt Tiranës do të devijohen përmes rrugës Petrit Radovicka, ndërsa ato që vijnë nga Tirana do të orientohen te Kthesa e Kamzës për të ndjekur rrugën dytësore industriale ose autostradën drejt Vorës.
• Faza e dytë: Më 7 qershor, nga ora 05:00 deri në 15:00, punimet do të përqendrohen në korsinë nga ana e Tiranës. Gjatë kësaj kohe, qarkullimi do të jetë i hapur pjesërisht me nga një korsi për secilin kah lëvizjeje.
• Faza e tretë: Nga data 7 qershor, ora 23:00, deri më 9 qershor, ora 10:00, trafiku do të devijohet në korsinë nga ana e Durrësit. Qarkullimi do të vijojë me nga një korsi për secilin drejtim.
Autoritetet u kërkojnë drejtuesve të mjeteve dhe banorëve të zonës që të respektojnë sinjalistikën rrugore dhe të planifikojnë lëvizjet e tyre paraprakisht për të shmangur ngarkesën në trafik.