Shërbimet e Policisë Kufitare dhe Njësisë Policore Detare kanë ndërhyrë për të ndaluar një mjet lundrues tip Jet Ski, i cili është konstatuar duke lundruar brenda perimetrit të sigurisë në sektorin detar të Ishujve të Ksamilit. Sipas autoriteteve, mjeti kishte hyrë në zonën e përcaktuar për larjen e pushuesve, duke krijuar rrezik për jetën dhe sigurinë e tyre.
Në përfundim të veprimeve administrative, mjeti lundrues është bllokuar nga forcat policore. Drejtuesi i tij, i identifikuar me inicialet P. A., është ndëshkuar me masë administrative prej 500 000 lekësh. Policia e Shtetit ka bërë me dije se monitorimi i vijës bregdetare do të vijojë pa ndërprerje me qëllim garantimin e sigurisë së pushuesve dhe zbatimin e rregullave të lundrimit. Autoritetet u kanë bërë apel përdoruesve të mjeteve lundruese dhe subjekteve operuese që të respektojnë rigorozisht perimetrat e sigurisë dhe të mos hyjnë në zonat e destinuara për pushuesit.