Shërbimet e Policisë Kufitare dhe Njësia Policore Detare kanë ndërmarrë një masë administrative ndaj një drejtuesi mjeti lundrues tip Jet Ski, pas konstatimit të shkeljes së rregullave të lundrimit. Shtetasi me inicialet A. P. është gjobitur me vlerën e 500 000 lekëve të rinj, pasi mjeti i tij u identifikua brenda perimetrit të sigurisë në zonën e plazhit në Ksamil.
Sipas njoftimit zyrtar, veprimi i drejtuesit të mjetit përbënte rrezik për jetën dhe sigurinë e pushuesve që ndodheshin në zonë. Si pjesë e procedurave administrative, mjeti lundrues është bllokuar nga efektivët dhe është dërguar në Portin e Sarandës. Policia e Shtetit ka njoftuar se patrullimet përgjatë vijës bregdetare do të vijojnë me intensitet, me qëllim parandalimin e shkeljeve të tjera dhe garantimin e sigurisë për pushuesit. Nëpërmjet këtij rasti, autoritetet apeluan sërish për respektimin rigoroz të rregullave të lundrimit nga të gjithë përdoruesit dhe operatorët e mjeteve lundruese.