Tedi Blushi, kreu i Grupit Parlamentar të Partisë së Lirisë, deklaroi në foltoren e Kuvendit më 19 janar 2026 se prania e zv.kryeministres Belinda Balluku, e cila është marrë e pandehur nga SPAK, përbën një provokim nga mazhoranca.
Ai e cilësoi turp sjelljen e mazhorancës dhe të kryeparlamentarit Niko Peleshi për moskalimin në votim të heqjes së imunitetit të Ballukut dhe mosdorëzimin e saj para drejtësisë. Blushi foli në emër të grupit të tij bashkë me deputetët opozitarë dhe kërkoi dërgimin e saj drejtësisë.
Sipas tij, mazhoranca po bëhet mburojë e korrupsionit. "Kjo që po bëni sot është një provokim, jo ndaj opozitës, por ndaj të gjithë qytetarëve shqiptarë. Nuk mund të bëheni mburojë e korrupsionit. Ju Niko jeni damkosur sot pas Ramës, si provokatori më i madh. Flaka do bjerë edhe mbi ju. Prania e Ballukut që nuk është gjë tjetër veçse mafioze, kini vullnetin t’ia dorëzoni drejtësisë, të mos bëheni mburojë. Turpi juaj, turp", tha Blushi.
Deklarata u bë në një seancë ku opozita protestoi kundër pranisë së Ballukut në sallë.