Tedi Blushi, kreu i grupit parlamentar të Partisë së Lirisë, foli në seancën plenare të Kuvendit më 30 mars 2026 për çmimin e lartë të naftës.
Ai deklaroi se "Kuvendi sot vjen erë naftë", duke shtuar se çdo shqiptar ndien neveri për këtë arsye. Sipas Blushit, shumica e deputetëve nuk mbrojnë interesin publik, por atë të një karteli që, në bashkëpunim me Edi Ramën, ka shtuar kostot për çdo shqiptar, fermer e biznes.
Blushi e cilësoi Bordin e Transparencës si zhvatës, i vetmi bord në historinë e një vendi demokratik që mblidhet për të rënduar barrën fiskale ndaj qytetarëve. Ai nënvizoi se kjo seancë duhej të dilte me një vendimmarrje sa i përket krizës që rëndon në xhepin e çdo shqiptari.
Deputeti theksoi se shumica nuk fusin dorën në xhep për të mbushur makinën me naftë, sepse shqiptarët ua mbushin Mercedes-in luksoz dhe rimbursohen me taksat e tyre. "Nuk ka krim më të madh sesa heshtja për një krizë që duhet të marrë zgjidhje", përsëriti ai.
Grupi parlamentar i Partisë së Lirisë ka depozituar një projektligj për uljen e çmimit të naftës.