Deputeti i Partisë Demokratike, Luçiano Boçi, në mbledhjen e Konferencës së Kryetarëve të Kuvendit të Shqipërisë, deklaroi se mazhoranca ka kthyer Kuvendin në një institucion pa vlerë.
Sipas tij, ligjet miratohen natën, pa debat dhe pa transparencë, në shkelje të standardeve parlamentare. Boçi përmendi se në seanca hidhen nga 20 projektligje njëherësh, pa diskutim dhe pa përfshirje reale të opozitës, çka e zhvesh Kuvendin nga roli kushtetues.
Ai veçoi ndryshimet e fundit në Kodin Penal, të miratuara në orën 3 të mëngjesit, pa konsultim dhe me pasoja të thella për shoqërinë. “Është e papranueshme që ndryshime të rëndësishme në Kodin Penal të kalohen në orën 3 të mëngjesit, pa konsultim, pa transparencë”, u shpreh Boçi.
Deputeti demokrat kërkoi shtimin e numrit të seancave parlamentare, duke thënë se opozita është e gatshme për punë dhe debat. Megjithatë, sipas tij, mazhoranca nuk dëshiron debat, por kalimin e ligjeve në “tymnajë”, si strategji për të shmangur llogaridhënien dhe për të anashkaluar opozitën.
“Ligjet që prekin drejtpërdrejt jetën sociale, ekonomike dhe publike të qytetarëve kalojnë pa diskutim. Kjo nuk është rastësi, por strategji e qëllimshme për të minuar demokracinë parlamentare”, përfundoi Boçi.