Gjykata Themelore në Prishtinë dënoi togerin e Policisë së Kosovës Bojan Jevtiq me gjashtë vjet burgim dhe dy mijë euro gjobë pas miratimit të marrëveshjes për pranim fajësie lidhur me akuzat për spiunazh dhe armëmbajtje pa leje.
Gjykatësi Kushtrim Shyti caktoi gjashtë vjet burgim për veprën penale spiunazh dhe dy mijë euro gjobë për armëmbajtje pa leje, duke shpallur një dënim unik.
Masa e paraburgimit vazhdon. Gjykata urdhëroi shkatërrimin e armës së gjetur dhe konfiskimin e sendeve të tjera sipas ligjit. Jevtiq ndalohet të ushtrojë funksione publike për pesë vjet pas mbajtjes së dënimit.
Prokurori special Bekim Kodraliu dhe avokati Millosh Nikoliq morën pjesë në seancë. Palët kanë të drejtë ankese brenda tridhjetë ditësh.
Përditësime
Gjykata konfiskoi 2 milionë dinarë serbë, 10,220 euro dhe 500 franga zvicerane, ndërsa 3,217 euro u kthyen si pasuri e ligjshme. Koha e paraburgimit që nga 17.07.2025 llogaritet në dënimin e Bojan Jevtiq, i cili duhet të paguajë 100 euro paushall gjyqësor dhe 100 euro kompensim për viktimat. Apeli mund të paraqitet në Gjykatën e Apelit brenda 30 ditësh nga pranimi i aktgjykimit.