Bosnja dhe Hercegovina dhe Serbia janë ndër 12 shtetet që më 24 shkurt në Uashington iu bashkuan nismës amerikane për forcimin e sigurisë së furnizimit energjetik në Evropën Qendrore dhe Lindore.
Ministri i Punëve të Jashtme i Bosnjës dhe Hercegovinës, Elmedin Konakoviç, konfirmoi për Radion Evropa e Lirë se ka nënshkruar në emër të vendit të tij Deklaratën e përbashkët për forcimin e sigurisë së furnizimit me gaz natyror. Ai shpjegoi se nisma synon diversifikimin e burimeve dhe rrugëve të furnizimit, forcimin e infrastrukturës rajonale, përmirësimin e marrëveshjeve komerciale dhe sigurimin e stabilitetit afatgjatë energjetik.
Vendet nënshkruese
- Bosnja dhe Hercegovina
- Greqia
- Bullgaria
- Hungaria
- Serbia
- Polonia
- Rumania
- Sllovakia
- Moldavia
- Ukraina
- Kroacia
- Sllovenia
Nisma fokusohet në korridorin vertikal për shpërndarjen e gazit të lëngshëm natyror (LNG) përmes infrastrukturës ekzistuese ose të re. Konakoviç theksoi se SHBA synojnë të dominojnë tregun energjetik në aspektin gjeopolitik dhe ekonomik, çka përshtatet me interesat e Bosnjës dhe Hercegovinës.
Ai vuri në dukje se pjesëmarrja ndihmon në ndërtimin e Ndërlidhjes Jugore, duke zgjidhur problemet e furnizimit me gaz rus dhe duke e kthyer vendin në korridor transporti drejt Evropës Juglindore. "Ekonomikisht për ne do të thotë shumë", shtoi ai.
Për Serbinë, ministrja e Minierave dhe Energjisë, Dubravka Gjedoviq Handanoviç, njoftoi se vendi ka mbështetur iniciativën e SHBA-së.
Përditësime
Artanë Rizvanolli, ministre e Ekonomisë së Kosovës, mori pjesë në Samitin Transatlantik për Sigurinë e Gazit në Uashington.