Shtetet e Bashkuara dhe Irani u pajtuan të mërkurën për një armëpushim dyjavor, në ndërmjetësimin e Pakistanit. Gjatë këtij periudhe, palët pritet të zhvillojnë bisedime për një marrëveshje paqeje të përhershme.
Bota ka reaguar me mbështetje për këtë zhvillim në Lindjen e Mesme.
Reagimi i Bashkimit Evropian
Presidentja e Komisionit Evropian, Ursula von der Leyen, e përshëndeti armëpushimin, duke thënë se ai ul tensionet. “E mirëpres armëpushimin dyjavor për të cilin SHBA-ja dhe Irani u pajtuan mbrëmë. Ai sjell uljen e tensioneve, që është shumë e nevojshme”, deklaroi ajo. Ajo shtoi se negociatat duhet të vazhdojnë për një zgjidhje të qëndrueshme.
Reagimi i Gjermanisë
Kancelari gjerman Friedrich Merz e përshëndeti armëpushimin në luftën në Lindjen e Mesme dhe bëri thirrje për përfundim të konfliktit. “Qëllimi tani është të negociohet një fund i qëndrueshëm i luftës në ditët në vijim”, tha ai në një deklaratë. “Kjo mund të arrihet vetëm përmes diplomacisë”. Gjermania do të kontribuojë për garantimin e lirisë së lundrimit në Ngushticën e Hormuzit.
Reagimi i Francës
Presidenti francez Emmanuel Macron e quajti marrëveshjen “gjë shumë e mirë”. “Presim që në ditët dhe javët në vijim ajo të respektohet plotësisht në të gjithë rajonin dhe të lejojë zhvillimin e negociatave”, tha ai në fillim të një takimi me zyrtarë të mbrojtjes dhe sigurisë. “Dëshira jonë është të sigurohemi që armëpushimi të përfshijë plotësisht edhe Libanin”, shtoi ai.
Reagimi i Mbretërisë së Bashkuar
Kryeministri Keir Starmer udhëtoi drejt Gjirit për bisedime me liderët rajonalë, në përpjekje për të siguruar hapjen përgjithmonë të Ngushticës së Hormuzit pas armëpushimit. Zyra e tij njoftoi se ai mirëpret marrëveshjen e armëpushimit të arritur gjatë natës, “e cila do të sjellë një moment lehtësimi”