Sektori i bujqësisë në Komunën e Istogut është goditur rëndë nga një breshër i fuqishëm, i cili ka shkaktuar dëme të konsiderueshme në kulturat bujqësore. Sipas vlerësimeve fillestare të bëra publike nga Drejtoria për Bujqësi, dëmet përfshijnë afërsisht 90% të sipërfaqeve të mbjella në territorin e kësaj komune.
Drejtori i Drejtorisë për Bujqësi, Artan Gegaj, deklaroi se gjendja është e rëndë, pasi komuna përveç breshërit është përballur gjithashtu me një aksident tragjik. Për të pasur një pasqyrë të saktë të situatës dhe numrit të fermerëve të prekur, Komuna e Istogut do të nisë krijimin e komisioneve për evidentimin dhe vlerësimin e dëmeve në terren duke filluar nga mëngjesi i së martës.
Kryetari i komunës, Ilir Ferati, është angazhuar për menaxhimin e situatës dhe mbështetjen e fermerëve gjatë procesit të vlerësimit të pasojave. Njëkohësisht, drejtori Gegaj i ka bërë thirrje Ministrisë së Bujqësisë për reagim të shpejtë dhe ofrim të mbështetjes emergjente për të ndihmuar bujqit vendas që të tejkalojnë këtë situatë, duke theksuar nevojën për ndërhyrje të menjëhershme për shkak të përmasave të dëmit.