Drejtoria për Bujqësi, Pylltari dhe Zhvillim Rural në Komunën e Skenderajt ka filluar procedurat për evidentimin dhe vlerësimin e dëmeve të shkaktuara nga moti i lig dhe breshëri që përfshiu zonën një ditë më parë.
Drejtori i kësaj drejtorie, Sabit Ferizi, ka kryer vizita në terren së bashku me ekipin e tij për të vëzhguar gjendjen në fshatrat Vajnik, Burojë, Likoc dhe Izbicë. Sipas njoftimit zyrtar, dëmet janë të konsiderueshme dhe prekin kulturat e drithërave, pemëve dhe perimeve. Vlerësimet paraprake tregojnë se në fshatin Vajnik janë dëmtuar rreth 60 hektarë të mbjella me grurë. Fermerët e prekur kanë filluar tashmë dorëzimin e kërkesave për vlerësimin e dëmeve pranë autoriteteve komunale.
Procesi do të pasohet nga dalja në terren e Komisionit Komunal për Vlerësimin e Dëmeve nga Fatkeqësitë Natyrore. Pas përfundimit të vlerësimit, raporti përkatës do t’i dërgohet Kuvendit Komunal për shqyrtim dhe miratim. Në fund, dokumentacioni do t’i përcillet Komisionit Qendror Qeveritar për shqyrtimin e mundësive të kompensimit për fermerët e prekur.