Komuna e Suharekës ka njoftuar se vazhdon pranimin e kërkesave nga qytetarët që kanë pësuar dëme si pasojë e vërshimeve të fundit. Kryetari i komunës, Bali Muharremaj, ka ftuar të gjithë të prekurit të dorëzojnë kërkesat pranë Komisionit Komunal për Vlerësimin e Dëmeve, me qëllim evidentimin dhe vlerësimin e dëmeve.
Bali Muharremaj ka theksuar se qëllimi është që çdo qytetar i prekur të marrë mbështetjen e duhur dhe të rifillojë normalitetin pas dëmeve të shkaktuara nga vërshimet.
Dokumentacioni i kërkuar
Qytetarët duhet të dorëzojnë:
- Kërkesën që merret dhe plotësohet në administratën komunale;
- Kopjen e letërnjoftimit;
- Konfirmimin bankar me llogari në emër të aplikuesit;
- Fotografi të printuara me ngjyrë që dëshmojnë gjendjen reale të dëmeve;
- Çdo dokument shtesë që vërteton pronësinë, nëse ekziston.
Vendet dhe afati i dorëzimit
Kërkesat dorëzohen personalisht deri më 22 janar 2026 në:
- Zyrën nr. 1;
- Drejtorinë e Bujqësisë;
- Drejtorinë e Shërbimeve Publike dhe Emergjente,
të gjitha në objektin e Komunës së Suharekës.