Pas zjarrit të përmasave të mëdha që përfshiu kodrat e Himarës, autoritetet vendore kanë nisur punën për evidentimin dhe vlerësimin e dëmeve të shkaktuara. Kryetari i Bashkisë Himarë, Vangjel Tavo, konfirmoi se një komision i posaçëm po operon në terren për të identifikuar familjet në nevojë dhe për të dokumentuar dëmet materiale, me qëllim ofrimin e mbështetjes dhe dëmshpërblimit për banorët e prekur.
Strukturat e Bashkisë Himarë dhe Ndërmarrja e Shërbimeve Publike janë të angazhuara në normalizimin e situatës. Në lagjen “Kalto”, ekipet po punojnë për lirimin e akseve rrugore dhe garantimin e qarkullimit të automjeteve. Autoritetet raportojnë se situata është aktualisht nën kontroll, pas operacioneve për izolimin e vatrave të zjarrit gjatë natës dhe mëngjesit.
Bashkia Himarë u ka bërë thirrje banorëve të prekur që të raportojnë dëmet ose nevojat për asistencë pranë Drejtorisë së Emergjencave. Përveç kanaleve zyrtare, qytetarët mund të kontaktojnë numrat e vënë në dispozicion për problematikat e mëposhtme:
- Furnizimi me ujë: 067 520 1417
- Energjia elektrike (OSHEE): 069 757 3550
- Nevoja të tjera për ndihmë: 069 346 5270 dhe 069 463 6213